Bir ömrü ləyaqətlə, şərəflə yaşamaq qismət olmur hər kəsə.. Süjetimizin qəhrəmanının 72 illik ömrü isə amalı, peşəsinə olan vurğunluğu, insansevərliyi ilə gələcək nəsillərə nümunədir..1952-ci il yanvarın 2-də Masallı rayonunun Mololon kəndində zəhmətkeş ailəsində bir oğul dünyaya gəlir. O zamanlar atası, II Dünya Müharibəsinin iştirakçısı olan Zamanov Qarakişinin ağlına belə gəlməzdi ki, övladının gələcək uğurları tək doğma kəndi ilə məhdudlaşmayacaq. Hələ kiçik yaşlarından insanları sağlam görmək, xəstəliklərə qalib gəlmək istəyi onu gecə-gündüz demədən oxumağa sövq edir. Güclü zəkası ilə həmyaşıdlarından seçilən qəhrəmanımız Azərbaycan Tibb Universitetini müvəffəqiyyətlə bitirdikdən sonra fəaliyyətinə Mirqasımov adına Respublika Klinik Xestaxanasında başlayıb. Qısa müddətdə pasientlərin sevimli həkiminə çevrilən Hacıməmməd Zamanov sonralar tibbi fəaliyyətini Masallı Rayon Xəstəxanasında, Lənkəran şəhər Diaqnostikasında davam etdirib. Hazırda Lənkəran Dövlət Mərkəzi Xəstəxanasının həkim-terapevtidir. Qeyd edək ki, Hacımməmməd Zamanov tanınmış yazıçı şair, müəllim Soltan Zamanın qardaşıdır.
Çalışdığı müddətdə məsuliyyətli işini yoruldum demədən icra edən həkim-terapevt pasientlərə şəfa bəxş etməklə kifayətlənmir, xoş rəftarı, mülayim təbiəti ilə də onları daim sevindirir. 4 qız, 1 oğul atası olan Hacıməmməd həkim, övladlarının, nəvələrinin fəxridir. Bu gün onun 72 yaşı tamam olur. Bu münasibətlə, doğmaları, yaxınları onu təbrik edir. Kristal TV olaraq, biz də təbriklərə qoşulur, Uca Yaradanın bəxş etdiyi ömrü sağlam canla yaşamağını diləyirik!!! 100 illik yubileyinizi qeyd etmək diləyi ilə....
