03 mart 2026-cı il tarixində Tovuz rayonu üzrə təhsil sektorunun tabeliyində fəaliyyət göstərən ümumtəhsil məktəblərinin direktor və direktor müavinləri ilə geniş tərkibdə işgüzar görüş keçirilib. Görüşün əsas məqsədi ümumi təhsildə keyfiyyət göstəricilərinin artırılması, tədris prosesində mövcud vəziyyətin təhlili və qarşıda duran prioritet vəzifələrin müəyyənləşdirilməsi olub.
Tədbir zamanı ümumtəhsil məktəblərinin IX sinif şagirdləri arasında keçirilmiş monitorinq imtahanlarının nəticələri ətraflı şəkildə müzakirə edilib. Nəticələrin təhlili əsasında məktəblər üzrə mövcud nailiyyətlər və inkişaf etdirilməsi zəruri olan istiqamətlər diqqətə çatdırılıb. Çıxış edənlər vurğulayıblar ki, monitorinq imtahanları tədrisin keyfiyyətinin obyektiv qiymətləndirilməsi, zəif və güclü tərəflərin müəyyənləşdirilməsi baxımından mühüm əhəmiyyət daşıyır.
Görüşdə həmçinin təhsilin keyfiyyətinin yüksəldilməsi istiqamətində konkret tapşırıqlar verilib, məktəb rəhbərlərinə tədris prosesinə nəzarətin gücləndirilməsi, müəllimlərin metodiki fəaliyyətinin dəstəklənməsi və şagird nailiyyətlərinin davamlı izlənilməsi tövsiyə olunub. Bununla yanaşı, keyfiyyət fəaliyyət planının icra vəziyyəti nəzərdən keçirilib, qarşıya qoyulan hədəflərə nail olunması üçün əlavə təkliflər səsləndirilib və fikir mübadiləsi aparılıb.
Qeyd edək ki, Qazax-Tovuz Regional Təhsil İdarəsi tərəfindən bu cür görüş və müzakirələrin mütəmadi şəkildə təşkili təhsil müəssisələri arasında əlaqələndirmənin gücləndirilməsinə, idarəetmədə şəffaflığın və səmərəliliyin artırılmasına mühüm töhfə verir. Bu cür tədbirlər elm və təhsil sahəsində strateji hədəflərin reallaşdırılması, şagirdlərin bilik və bacarıqlarının yüksəldilməsi, ümumilikdə regionda təhsilin inkişafı baxımından xüsusi əhəmiyyət daşıyır.
Sonda bildirilib ki, qarşıdakı dövrdə də təhsilin keyfiyyətinin artırılması istiqamətində məqsədyönlü tədbirlər davam etdiriləcək, məktəblərin fəaliyyətinin daha da təkmilləşdirilməsi üçün sistemli iş aparılacaq
