Tovuz rayonunda fəaliyyət göstərən M. Ələkbərov adına fizika, riyaziyyat və informatika təmayüllü liseyin növbəti uğurları ilə diqqət mərkəzinə düşüb. Həm idman, həm də akademik sahədə əldə olunan nailiyyətlər məktəbin yüksək səviyyədə idarə olunduğunu bir daha sübut edir.
05 may 2026-cı il tarixində Gəncə şəhərində keçirilən “Məktəbli kuboku” yarışının 1/4 final mərhələsində Tovuz rayonu Mahir Ələkbərov adına tam orta ümumtəhsil məktəbinin 7-ci sinif şagirdlərindən ibarət mini futbol komandası möhtəşəm çıxış nümayiş etdirib. Komanda Yevlax şəhərinin təmsilçilərini 5:2 hesabı ilə məğlub edərək yarımfinal mərhələsinə yüksəlib. Bu qələbə məktəbin idman sahəsindəki uğurlarının davamlı olduğunu göstərir və kollektivdə böyük ruh yüksəkliyi yaradıb.
Akademik sahədə də uğurlar davam edir. Bir neçə gün öncə Tovuz rayonu M. Ələkbərov adına fizika, riyaziyyat və informatika təmayüllü liseyin 10-cu sinif şagirdi Rüstəmova Zəhra Fariz qızı Respublika Fənn Olimpiadalarının final mərhələsində biologiya fənni üzrə iştirak edərək bürünc medal qazanıb. Bu nailiyyət liseyin şagirdlərinin elmi bilik və hazırlıq səviyyəsinin yüksək olduğunu bir daha təsdiqləyir.
Bununla yanaşı, 01 may 2026-cı il tarixində liseydə növbədənkənar pedaqoji iclas da keçirilib. İclasda IV və VI siniflər üzrə keçirilmiş monitorinqlərin nəticələri geniş şəkildə təhlil olunub, şagirdlərin bilik və bacarıq səviyyəsi ətraflı qiymətləndirilib. Güclü və zəif tərəflər müəyyənləşdirilərək gələcək fəaliyyət istiqamətləri planlaşdırılıb. Həmçinin “Son zəng” tədbirinin yüksək səviyyədə təşkili üçün görüləcək işlər müzakirə edilərək konkret tapşırıqlar verilib.
Qeyd etmək lazımdır ki, bütün bu uğurlar məktəbin rəhbərliyinin peşəkar və yüksək səviyyəli idarəçiliyinin nəticəsidir. Məktəb direktorunun məqsədyönlü fəaliyyəti, müəllim kollektivi ilə sıx əməkdaşlığı və təhsilə verdiyi xüsusi önəm həm şagirdlərin nailiyyətlərində, həm də ümumi tədris mühitində özünü açıq şəkildə göstərir. Bu yanaşma valideynlər tərəfindən də böyük rəğbətlə qarşılanır və onların məmnunluğunu artırır.
Beləliklə, Mahir Ələkbərov adına təhsil müəssisələri həm idman, həm də elmi sahədə qazandıqları uğurlarla regionun qabaqcıl məktəbləri sırasında mövqeyini daha da möhkəmləndirir.
